Këshilla dhe udhëzime

Këshilla dhe udhëzime

Shkruar nga Fatmir S.Idrizi

• Sinqerisht dhe në tërësi dorëzoju Allahut xh.sh. në të ngjitha qëllimet dhe ruaju nga hipokritët në fjalë dhe në vepra.

• Ndiqe sunnetin e të Dërguarit të Allahut xh.sh me fjalë, me vepra dhe me sjelljen tënde të tërësishme.

• Frikësohu nga Allahu xh.sh. dhe vendos në mënyrë të paluhatshme se do t'i kryesh të gjitha urdhrat e Tij dhe të largohesh nga gjithçka që e ka ndaluar.
• Në tërësi dorëzoju rregullave fetare, ngase vetë Islami është marrë nga fjala arabe “Istislam” që do të thotë përkushtim, dhe mos u mundo që me mendjen tënde t'I njohësh të gjitha, sepse mendja ka kufij përtej të cilëve nuk mund të kalosh, ashtu siç ka shikimi largësinë e fundit gjer te e cila arrin dhe nuk kalon.

• Shoqërohu me njerëzit e ditur (alimë) dhe sillu bukur ndaj tyre dhe përpiqu, t'i duash dhe të shërbehesh me diturinë e tyre. Të gjitha këto ua bën shprehi edhe fëmijëve tuaj, ngase dijetarët janë pasardhës (trashëgimtarë) të të dërguarve të Allahut xh.sh.

• Dëgjoji vazet (ligjëratat) dhe shërbehu me to.

• Të vërtetën pranoje nga secili dhe ruaju nga kokëfortësia dhe mendjemadhësia.

• Besimin (itikad) përshtate me Kur'anin dhe sunnetin dhe ruaju besimit dhe fjalëve, që shpijnë jashtë fesë.

• Beso fuqimisht në Allahun xh.sh., melekët e Tij, Librat (e Tij), Pejgamberët dhe ditën e Gjykimit, dhe se gjithçka çka ndodh bëhet me lejen dhe caktimin e Allahut xh.sh..

• Mos ndiq verbërisht askënd deri sa të mos e vërtetosh drejtësinë e saj për të cilën të thërret.

• Kur'anin mos e komento sipas mendimit tënd, por mbështetu në të dhënat burimore të tefsirit.

• Bëhu i durueshëm me arritjen e diturisë dhe mësoji të tjerët, sepse më i miri është ai që kërkon diturinë dhe I mëson të tjerët.

• Doemos gjeje (siguroje) një libër nga Fikhu i Hanefive.

• Bleje dhe lexoe një libër mbi Muhammedin a.s dhe shokët e tij.

• Shmangu literaturës pornografike dhe librave, të cilat janë në kundërshtim me mësimin Islam.

• Bëhu gjithnjë i pari në vepra të mira për të cilat do të shpërblehesh dhe do të arrish shpërblimin e të gjithë atyre, të cilët marrin shembull në ty.